حكايتي امغير اسمعوها

وردينا ليكم مرة ثانية
وانشالله اتكونوا بخير
المهم زي ماحكيت ليكم اوحلت في تقراية دراري خوتي
ماني ناقصة وجع ادماغ
وبعد ماتعشينا معاهم انفيصات بالدحي والهريسة
روحت اني وامي وخشينا دارنا بعد ما تقت سيدي بالك يبي حاجة
قالي سلامتك غير غطيني
واغطيته واسكرت عليه الدار واخشيت انخمدت في فراشي نتقريص وتوا تصبحوا علي خير واتنوضوا علي خير
وبعد مانختم بالصلاة والسلام علي النبي الكريم
انقولكم
عالكم خش القلب خش القلب
دار افرينوا انقلب

صباح الخير

صباح الورد والنوار
اليوم ياهلنا نبوا انحدروا للبلاد
بنمشوا لخالتي
اللي امروحة من الاردن
ماهو طلعت نظيفة
قصدي صاغ سليم
يعني ماهيش
تابعة كتيبة العقم
وعاد ني محسوبتكم فرحانة نبي نمشي لخالتي انشوف حتي الدنيا وانرتاح من قباح سيدي وخوتي وانسوينهم
عجنت السفنز ورميت الفطيرة وقالي سيدي دريلها قلوني زيت وحبل قرموس
وامي عبتلها داقرة بسيسة

وانستنوا توا في المنجوه خوي طارق
باش بيرفعنا
اسكتوا مش البارح انسيت باب الحوش مفتوح
تي ماهو خوتي ايعطلوا في الهذرزة
وايقوللي ردي بالك اتسكري الحوش
علي خاطر كان يسمعهم سيدي ايطقوا عقاب الليل
ايديرنا ليلة بالطبيلة وهات شني ايحزها المناجيه روحوا وكل واحد اعبي علي الثاني وماسكرش الباب
ياودي اسهورهم
مانيش هاضماته
وين انقوللهم وين تمشوا ايقول المجلس
هاما ه خبر ماايخشلي ادماغ
ياكبادي الدنيا اتخوف اليوم اتخاف علي الذكر اكثر من الانثي الشرب كاثر والجلاطينة يلعبوا بها في السيزة
وربي ايستر علي خوتي
وايستر علي كل المستمعين
وتوا اتبقوا علي خير
وانقوللكم في نهاية مراسلتنا لهذا الصباح
امريض والدواء ياله
والدواء ياله قلال عرف جابوله الكفن
وانقول هدية خاصة لناس خاصين
البعد شقيق الموت شقيق الموت
عزاهم عزاء ماواحد بقا
بسلامة

وينك مواطنه ليبيه فاقدك راهو هلبه

وجينا جينا جينا

وياشينك

اقصد يازينك جية

هلا باليسار واليمين والوسط

ماتفقد غوالي

ياطويل العمر

اخ يادنيا

اخيه عليها

واللي يفرح بيها

عدنا واكيده بعضهم عوتدتنا جمر غلي افادهم

وراك وراك انت واودينات القطاطيس

اللي مارفقينك في رودوك

كاشفاك

وعارفتك زين تلعب علي الحبلين

هههههههههههه

الكلام مش شوركم ياهلنا

الكلام مسج لشبير ناقص هههههههههههههههههوووووووووووووووييييييييييي

توا ارتحت

وغدوة انحكليكم علي شنو ديرت في غيبتي عليكم يازينين

ونهديكم هذه الاغنية

الليل الليل الليل

كثر خيره

القيته حنون وخيرلي من غيره

طبيعي العزال الشارد ايقول بعد سماع اهدائي

الذئب الذئب

الذئب كثر خيره

وتوا ناموا نوم العوافي علي قلوبكم ههههههههههههههههههههههه

تاكي تاكي ياودينات القطاطيس تاكي

عدنا ليكم ياهلنا ماتطاقناش صبر

بعد ماقلت هيا انتمرقدوا

اتقول عليا بوفقاق

نقزت من سريري جيته واقفة ياباب

مش مني من البسيسة اللي تغرلي فيها امي

بصراحة باهل الخير مرة مرة

نتجول بين الفيسات وانشوف ولد سيدي وين حذرت بيه الايام

هو صحيح مانحبلاش شبح

واكان عندي جهد انطق فيه العشرة

لكن جاي بعيد في منازل بعيدة

المهم ولد سيدي خاش في الفيس درازي اتقول امركب موتور طانطا ومامخلي حاجة الا وحاشر روحه فيها هالمنجوه اللي امفيض عليا مرارتي

لكن

مقصود الكلام اليوم قعدت انبهت في وجهه اللي اتقول مضروب بمغرف عصيدة ليقته بلا لحية

يعني ولد سيدي علماني وك وك وك

ياباب خش التطربيقة

وياودي حاله حصيله مايطمن

اخ تي ني حتي لو عمل لحية وقعد بساوي فيها ويمشط ويبخخ بالصناين

لايزيد عندي لايقدم بس انوقض فيه المنجوه

وتاكي تاكي يلحية ولد سيدي تاكي

صباح الخير
عدنا ياهلنا وانشالله صباحكم مبروك
البارحة في الايام تي غير استنوا جاينكم بحكاية خالتي اصبروا علينا
قلت البارحة عقاب تهودية نسمع في خوي حسن ايقول لخوي طارق باراجل شنو قصة جيش برقة توا بيفتحوا اعلينا الباب لجيش ورفلة وجيش ككلة وجيش العجيلات
وناض سيدي يتبعثر شنو فيه يافروخ خيركم تتهاوشوا
ياك لا سو
ارقد ياسيدي نشربوا في تويسطة شاي كان خاطرك تعال
وناض سيدي وهو مايصدق يسمع بكليمة شاهي لين ايجي يلهد واتكه سيدي وحتي اني نوضت كان خاطري ندير زيهم اتوسصة بلحليب بعد مالنوم جفاني وطار من عيوني واني في جرة ولد سيدي من شعبة لشعبة
واقمزت معاهم وابديت انجغم في الشاهي بلحليب وشويه خشيت علي الخط قلتلهم توا اتقولوا جيش برقة زعما ماايكونش زي تمام سيدي جيش الابرق جا هزين
نتور فيا سيدي وقالي انطمري ياطفلة الخبر ماهو ليك
لكن اني ياباب عصلبة قتله ياسيدي توا احني فري فري هاك الزمان طامسين راي توا فرخ صفية اخزرتكم من كليمة قالها وجه الشكورته وديرتوا غرفة امنية وخليتوا الناس حايسة في بعضها عذرا من الحاسي لتشابة الالقاب عليك ناس معندها تقة في نفسها
استعراض واسنفار اتقول عليكم خاشين علي حرب من تقريعة فم الخرارة حفيد المفركشة
يابنت تحشمي من سيدك يفري مصارينك وايجيبهم كدس قدامك قالي خوي طارق باش عاد يرضي سيدي
لكن سيدي قالهم لمن اني انكون موجود محدش ايكلم الليلة الحرفة اختكم علي ها لراي بنفكر انديرها الناطق باسمي في الانتخابات
سلم بنتي الفاهمة اللي ماهي زي الداحيات بنات سيدها الزوام ترا واحد فيكم ايقدر ايجيب الكلام امساوي علي الجرح قد قد زيها
المهم اني نوضت ومعاد شايفة شي اتقول عليا فروج بيبي ودرت روحي حرجانة وسيدي ايقولي تغير كملي حليبك وحسن ياقولي ماتعدليش عليه بولسان متبري منه
لكنتي اني نوضت قلتلهم النوم امدهشرني وخشيت فرشاي وتغطيت ببطانيتي واني نسال في روحي
زعما خيره المنجوه الاملت ولد سيدي ماكتبشي علي جبش برقة واستعراضها في بنغازي
كل ليهيده ضاع فاشوش ياخال
بايت طول الليل وهو يعسس ويبرق في عويناته اللي اتقول عليهم عيون بقة يالوكان ايشيل المرايات من عليهم ايقعد اتفتف
المنجوه ولد سيدي
واغطيت راسي ونسمع في سيدي ايقول للدراري نوضوا اتمركدوا غدوة وراكم صبح
وجاني صوت سيدي وهو ايقولي الصبح نبوا اسنفز يابنت
هه سيدي مايخدم غير علي بطنه اللي اتقول جابية منقوته قدامه المهم دنكست راسي في فراشي واني اربب في عوينتي انهاش مانرقد حتي لفتة

ايوه المنجوه باين عليه ناض ايتبعثر حايس في اجروده
المنجوه خيركم ياعرب قداش بنوضحلكم
ولد سيدي
ماني توا شفت لقيت 2 خاشين علي المنتدي
اكيدة هو واحد منهم
توا عاد نبي انشوفه شنو عنده من جديد بعد النومة

عقب صلاة الفجر
عاد الحق حق ماعندنا في الوطا غير شبرين
وهو ياودي حريص علي الصلاة
واذكار الصباح مااتفوته
الحق حق
وتوا انقوله باش نقلع العين علي روحي
صباحك بالخير
وصباح الابرق خير والتميمي والمخيلي
والضهر الحمر ح والفتائح
وعين مارة
وياوارده علي البئر ياوراده
مسه كرسة والقبة
بلاد شهيد الوطن عبدالفتاح
واشيحة وامغار والساحل والكرنيش والبلاد وبومنصور اللي ايقولها باب طبرق
وسلامات ياعيون الجاسر يابو خواصر دايرات اشرار

ياصباح يافتاح
ياكبادي ساقني بيها ولد سيدي علي الصبح
الناس تفطر علي حليب وافطيرة
واني ولد سيدي فطرني علي
عبدالله ناكر يا ك
ولد سيدي نايض اليوم متهستر شبحتي فيه ههههههههه شاغم حليب رائب
انوض عليا امواجعي بعد ما سقاني من بئر ناكر
قالي طفلي وطفلك
هههههههه
ههههههههه
نحلم بيهم ومانشبحهم من قيل يازين مبهاه يابال سلوا عوده
هههههه ياكبادي وقفوني علي الضحك
اي نوض توا خوي برق الليل ايشنقني بخيط اللامبة
هههههه
كالك طفلي وطفلك

تيه نيه
مش قلتلكم
ولد سيدي اليوم ماهو قادر ايشوف الخيط الابيض من الاسود
خش المندريف زيهم
من جهة يصلي وايقرالي كل صبح في الاذكار يحسباني غشيمة
زي راسه المقفوخ بطريحة هاك العام من ولد فصله

ومن جهة يتنابز بلالقاب
ويقول ياطحلوب
وك اتقول عليا نسمع في صبحية مرات خوي
ياودي شبحتي في ولد سيدي حتي هو ابدي ايجغم في كويس
قلبله ادماغه
يارب سترك انشالله هالخبر فاشي هي
كان هظا فضيحة في العيلة وهات شن ايلمها
قالك يوم الجمعة بيطلع في الحفلة
ماندري كونش من وراء فردة الحوش
ماهو عوايده
لين يتوكد ان كل الناس طلعت والدنيا امان
اهانشي مايقوف في التركينة يهرش في شعرات راسه الملمعات بكريمة دكان سيده فضيل في راس الزنقة
وتوا بسلامة ياعطر فواح ا اتقول عليك زهرة نرجس عععععععععععععععععووووووووووو قصدي هههههههههههههههو
وليد سيدي هدي الفرنوات اشوية
راني وراك وراك من صفحة لصفحة دهشتني يامنجوه لين معاد قادرة انطلع النفس من صدري
رد بالك ايزلبحوك الجماعة ويسقوك الاونته ويقولك عصير لوز
ماني عارفاتك الشبح داثر
وياواقي عليك
يوم الجمعة
اركح في مكانك وارقد مرقد جدي وجدك اللي معاد ناض

وانت اتقول عليك فرنانة من بنغازي لشحات لسوسة عطيك سوسة اترقدك يوم جمعة
واترقدني
بسلامة تو ياولد سيدي

مساء الخير ياهلنا
اعذروني يالوجوه الطيبة
علي التأخير
اللي خارج علي نطاقي
واسبايبه ولد سيدي اللي البارح امسهرني للفجر واني اندور وراءه من حقفة لحقفة
قصدي من صفحة لصفحة
ايبات ليل ماجاب الليل
ايبلحق
في النت
اتقول خزز
صحراء
واني عاد منجوهة المناجيه
نلهت اوراه اتقول اعلي نقصع لا مش قملته
جرته
اليوم شبحتي فيه واخد شلاكته وراقي للشلال
يااما ايمصص في عظيماته
ياما يغسل في شلاتيته
ولا زعم دار سانية وعرف مستقبله وابدي يعمر في الوطا اللي امعقبها جدي
وشوره وهو امروح خطم علي الرصد الجوي شرب معاهم شوهية وعرف حال جو البلاد
وبعدين روح اسمطله فردة خبزة بالتن
واتكأ وابدي يحارب في حاكم السوارة
وعادي حتي وهو راقد ماعنداش مشكلة اجماعته
اتحصنا
يرفوعه ايحارب الشبيحة وايروح في رمشة عين
مانا لا
هظا ولد سيدي ماتصعب عليه حاجة
الا اني هييهيهيييي
قاعدتله زي العظم في الرئة وكل مايتحرك هكي والا هكي انطقه بالطربيقة ورثي من جدي لمن امي وتوا نختصرلكم حكاية مشيتي لخالتي
المهم امشيت لحوش خالتي وافرحت بينا وهات ياشاهي وهات ياكاكاوية وهات يا بركوكش وجابتلي ساعة من الاردن وقفطان مزيون امنين لبسته اتقول عليا
الاميرة الليلة الحرفة
قصدي لاميرة مواطنة ليبية
وقعدنا عندها لين اكمل الثلج اللي جاءنا السني ههه
خيرات وامية بتدلف من الوادي في الربيع
اللي انستنوا فيه باش ايجفوا اعظماتنا من البرد
واني فرحانه ياسر
ماهو خوي طارق سجل اسمي في التعنيات الجديدة وبنبدا معلمة ونمشي في الطريق انتبختر زي فطيمتي البيضاء اللي سميتها لميس
هههههههههههههه
وتوا نبي انتمرقد ثاني
وانتلاقوا ياهلنا

السلام عليكم

والصلاة والسلام علي رسول الله

جيت بنتمرقد بحدا امي

قلت خلي انشوق بالكشي كتب حاجة هالمنجوه

لقيته كاتب كلام عاجبه اشبح وين وناقله باش عاد اوريلي فلاحته

المهم عجبني

وانزلت ويارتني ماانزلت القيت

عيد العشق ياهل الغرام

وقلت شوره المنجوه اتفكرني

لكن فرحة وماتمت تريته خشلي في الفتاوي

يعني من الاخر ياقلة شبحي في نوارة حمراء

هو اني من مدة مانخفيش عليكم

اعتزلت الغرام

لكن شوفتي في هاالنورات الحمراء

حركوا عليا اللي كان مدسوس

المهم احني اعلقنا الطواري في حوشنا حتي اتفوت ذكري 17 فبراير علي خير وخمير اما 14 فلنتاين ماجاب طارئه حد قدامي

عاد حلال عليهم حرام عليا المهم الكلام كله علي يوم الجمعة

ويارب مايبداش فيها البوني بين انسوين خوتي

واصغارهم سيدي حلف بالامين الواعر اللي يتكلم والا ايقول حتي حرف واحد ايقطع السانه

واني عاد قلت لخوي طارق جيبلي تورته كبيرة وشمعة

واجعلها ليلة خوتي \ضاوية كيف طريق الزاوية وخوي حسن قالي كان الامور هادية وراس اختي الحرفة مااتكوني غير في طرابلس واندهوروك هو احني قداش عندنا اخت يامواطنة

وتوا بنخش اندير الشاهي لسيدي وامي وبالسلامة وبش مايصير زعل خودوا ها النوارة الحمراء مني ليكم

لا مش علي خاطر فلنتاين

لالالا علي خاطر ولد سيدي اقريب يبدأ مستقل

عضو مستقل مايتبع حد عير روحه

وتوا بلسلامة الليلة عندي مانحكي لنجمة السماء

موضوع كبير وماهو سراب يادودي

مواطنة ليبية اسمحي لي ان اسجل اعجابي بكل كلمة تكتبينها حال اسرتك كما حال الوطن اكتبي لاننا ننظرك دائما يعني صرتي عاملة لمة عليك علي الاقل في حوشنا

مرحبا بولد الحاج
وانشالله غير لمتكم عليا مش زي معاذ الخدم في غوط الرثم
اسكتوا ساكت راهي راقية عندي لقباعتي
البارحة حاشكم بتت انمد وانرد من خوتي
ماهو سيدي كان يحساب الخطر جايه
غير من الكناين وجراهم
تاريته اولاده هم المصيبة اللي لاتتورا ولاتتعرا
ماهو اني ديما منجوهة
مش قلتلكم اطلبت نورته وياكبدي يسمع خوي برق الليل ويحسابني علي خاطر عيد تعالي نحبوا
دار ليلة ماهو ديما عوايده وابدي يقتي اقريب طلعني كافرة
وجي رواق وايقوله شنو فيه ياخي
وهو يقوله اختك هالصايعة تبي اخرتها اتخلينا عيلة كافرة
وسمع حسن وايجي سمح الطلبة يستفسر علي هرجة برق الليل واني لابدة في الدار ونسمع من وراء الفردة
قال خوي حسن هي ماتقصدش عيد العشاق
هي تقصد 17 فبراير
مانا حتي هو قول عادات جت مع ثورة فرنسا وحرمها وابدوا في صراع العقول وبعدين انت كانك ماتبيش الاحتفالات انت حر وحتي احني احرار ليبيا فري
وجي الضاوي وفتاح وطارق
خوي طارق ابدي الصحيح بينه وبين الضاوي منين قال الضاوي هه توا انشوفكم يوم الجمعة
وابدي البوني وبدي سلاقي امي وجت مرات الضاوي وجت مرات سعد الايام المصراتية وجت الزنتانية وجت الغريانية وجت الزواية يعني خوتي عاملين برلمان ليبي
واني جريت لسيدي وانادي اجري ياسيدي ولدك طارق ضرب خوه الضاوي
وجي سيدي ورواقينه سباقته وهو ايقول شوقتي فيكم
ياعيلة دردني
وطاح سيدي فاج عليه السكر وابدينا انسكحوا فيه بواصي والتمت الجيران ورفعوا سيدي للسبيتار
وجابوه وارموه في المربوعة والناس ايش قالك وايش قتلك فروخ الحاج صقر اتباطحو علي خاطر تورته
مش قلتلكم ماني منجوهه
وبعدين شنو لزني علي التورتات
الحصيلة خوتي التموا علي سيدي وخوي طارق لزه حسن وابصر وين خداته عجاجنه والضاوي طلع منها زي الشعرة من العجين
ماني ماقلتكمش هم كل واحد مايقبل الثاني غير امعمر واتطيحته جمعتهم
وبعدين طلع حق ربي
ياكبادي
كانكم علي خوي برق الليل وهابي لين امفوت
بيني وبينكم مرة قال لخوي رواق زيزة سيدك من امك باطلة قاله مانا انت ولد زنا يامنجوه
ياكبادي ايجبوا في فتاوي غريبة عجيبة
ورواق وهابي مخفف
وسعد الايام اللي في الاردن اخواني
وحسن مرة يسار ومرة يمين حسب الموقف
والضاوي كان عضوا باللجان الثورية
ومحمود اللي في كتيبة العقم بعمان
ماركسي
وفتاح معاهم معاهم
وابوزيد اللي هارب في تونس وطنه بطنه
وطارق اختلاطي وسيدي ماركسي علي ناصري واحيانا متعدد الاتجاهات
المهم هذا سبب غيبتي عليكم البارح
وتوا بنمشي اندير العشي وبعد غسل المعاين بنحكلكم علي قصتي مع المنجوه ولد سيدي مواطن بناء علي ماطلبه السادة الزوار تي هاللي يسمع ايقول حق

صباحكم صباح العشق والمعاشيق والخير لقدام
ياودي امشيت فيها نومة بعد عشوة البارح
يعني صابتني التخمة بعد مالخبصت في الماكاله
وهدرزت شوية مع سيدي علي الانتخابات
اتكا سيدي وقالي يامواطنة بيني وبينك شنو رايك انصير علماني ولا اخونجي
قتله كون ماالواقف وامشي
قالي
عصلبة
تفهمني خير من خوتك
واحني علي هالكلام خش خوي طارق وهو يضحك يعد مارده خالي للحوش قال سيدي خيرك يافرخ
قال سمعتوا اجليل يقولوا تاورغاء بيروحو يحساب روحه قاع وامقبع بيدير حاجة وثوار مصراته بيسكتوله
مانا خشوش الحمام زي اطلوعه
سيدي قالها يافرخ اخطاني انت واجليلك ومصراتك بره شوفك تركينة ثانية
المهم سيدي قالي يابنيتي خوتك هوذا مساطيل قاعدين اتبعوا في كلام الجرائد اللي تقول في كلام متسرع باش بيدروا بلبلة بين اجلبيل والمصارته وخوك مايصدق يسمع
المهم وراس بنيتي الليلة عاشك خير من ماكلة مطعم بوشوشة
شنو مطعم شنو قتلك بوشوشة
ايام سيدك كنت في بلاد الشلال والمترودة
ياعطي لعدوك غدة مغدودة وقهوتك شنو جابها للذبياني واجويدة
والعرودي

وك ياسيدي شورك البلاد برمها برم
مانه سيدك شوية
شوية وجت امي وقمزت بحدانا وقربت مني وقالتي جيبي التلفون بنكلم خوك بوزيد ودرتلها الرقم وكلمته وانجيت ياكبدي يلعية امك راهو يضحكوا عليك التوانسة ويلهفوا قرشاتك وين طاحت بيك الايام وبعدين بعد شورها اتطمنت قاتله مبروك ياوليدي قالها مبروك علي شنو قاتلها عيد الحب وك امي استهوت وضحكت وسكرت التلفون
قالها سيدي شنو ياحاجة شوره حتي انتي خشوك الخويطات
قاتله ياكبدي اليوم واني امروحة القيت دكان الماجوري امعلق قليبات حمر وين سالت كنتك قالتي عيد المحبة
قالها سيدي يامثبت العقول تي مانة البارح شونا كنا نعجونوا اقريب فروخك رمو رقبة بعضهم
وامسكينة امي هات شني ايفهما
لكنتي اني وين شفت خوي برق الليل رفعت صوتي وقلتها مبروك عليك يامي انتي وسيدي عيد الحبيبة
يامن ايقيص الضغط لبرق الليل يلقاه شايط لمن كان زقطي وامشي وماردش وك يكبدي يبرق في عيونه زي خزز الارنب العطشان
واسامحونا ياهلنا من كثر ماكليت الليلة راسي مدوشن ومانقدرش نحكي علي حكاية المنجوه ولد سيدي
خلوها بجوها
لانها حكاية طويلة وسمحة سماحة قهوة النجمة وخير من تفرشيكة علي كرسي من كراسي قهوة الكورنيش والميدان وتوا لالا مانبيش راقده نبي انشوف المنجوه شنو كاتب من حكاوي في الفيس هيا وانتم ارقدوا وانشالله ايامكم حب وعشق وغرام لهالوطن

اه يليلتي الطويلة
القداد واعيوني اللي اتقول امدوشنين من قابية بيرة
ماديرتلي طنين في وداني
خشيت مافيه جديد كله شافينه وحافظينه
وبعدين كل واحد يقول الكيب وين
تشنو مانه ساهلة
هات شن ايلمها قداش منه الراجل يلم من تركينة يقضوا عليه من تركينة
غير شنو جابك ياكيب للطبيخة الفائضة فيضة العبيد في الكفرة
هه
اليوم الكفرة وغدوة الجفرة وياخوفي بلاد بو عيون الفياشة اللي الناس راقدة وهو قليل ارقاده ارقد يافرخ وانت ليل ماجاب الليل التساهر في الحيوط
وراك وراك يا ولد سيدي

اه الناس راقدة واني قليل ارقادي
وك ياكبادي وك

صباح الحب
ياهلنا
سبحان امغير الاحوال
البارحة متخومة
واليوم نوضت اندور شنو انفتفت
وقبل ما انجيكم قلت انوشف مجري الدمع
شنو امداير
قصدي ماهو ولد سيدي امسمي روحه عين الشهداء وووك علي الورق بس بره عرة اتعرك سوريا اتنادي خليني حتي اني ابقول عليا ارمله الشهيد مانا تحساب الشهادة ساهلة
والبارح دوخني في قروب القبيلة
اعطييه سليمة ادرجحه
يحسابني
مانعرفه
تي ولد سيدي
يالوكان يحشي روحه في شيشة انطلعه انطلعه
المهم دوخني بانتخابات المصريين
هذي اخرتها يامنجوه
تبني نبدأ فولاةه اخر عمري جمري
لا مش انت وشواشه جت قدامي
المهم نايض اليوم يجيبلي قصائد للاطفال
يحسابني انمص في صبعي
ناسي اني اني كبرت وافتقدت وابديت حاجة ثانية
وهوقاعد ايزلبح فيا بنشيد وبصورة
هذي زعمته نوارة حمراء
ووووووووك البارح شفتها في الفيس ياراس القيس
وابعدين شطبها الشطاب
لكنتي وصلتني
ياغزال الجوابي
تعال هني يامتعوس مانه تبي الناس تسكت وتقول لشيخك عبدالجليل تمام سيدي زي ماكانوا ايقولوا فيها لراجل بنت الفراكشة
ووك معناه انت رايك الناس اللي واقفة في الشجرة وميدان الدزاير
هوذا ازلام القدافي
يازلم شيخك
وحدة بوحدة
ههههههههه
قصدي هم هم هم هم
يامنجوه برا هذا الكلام قوله قدام ميدان الشجرة
بنت يامتعوس
صاير انت طبال ابديت للحكام
وك عليا وك عزوني ياكبادي
ولد سيدي ابدي زمار للسلطة قصدي مزمار للحكومة بعطيك بومة تنقب اصابعك زي ولد عمتك يامنجوه
وك عليا وك ياوالله عليك صباح حب صبحني فيه

ايوه ايوه

امشيت بعقلي جت بلاه
قالك شبابنا الحلويين
ههههههههه
ياكبدي جهارا نهارا
ايعاكس فيا
وووك
اتحشم يامنجوه
هههههه
شباننا الحلوين
ايحساب روحه ايقدم في جنة الازهار
باهي اللي ماقلتش اطفالنا الحلوين
ضحكتني
ياودي بره دربك خضر نسيت وك مانك ماتحبش اللون الاخضر
برا مانه دريك احمر
ههههههه توا نبي انقولكم نبي انخش نقرأ رابط لقيته تحت هشام الشلوي لا ياودي مش زي مافهمتموا قصدي في موقع ايراسا تحت تعليق الاستاد الشلوي في موضوع الكفرة ياهلنا اسماه ليبيا فري اعطيك دي يصحن اعدوك هاني دعمتك تو
هههه يكبدي ولد سيدي دهشني في هالروابط كل يوم امدخني علي رابط يارب استر مايدخنيش في الممنوعات ههههههه

وتوا بالسلامة ياهلنا يالحلوين السمحيين

نهاركم سعيد
ياوجوه السعد
اللي ايشعشع من بعيد
البارحة ماطليت عليكم ولاجريت وراء ولد سيدي
ماهو العيلة كلها مرقده
ضربها البرد
وقعدت اني
عاد زعميتك الصغيرة فيهم
انعول عليهم
شي ليم
وشي توقوفت
وشي زعتر
وشي تغليفة خزامي بالزيت والخل
حصيلة امس في الايام ياودي تعبت
واني بين سيدي وامي وخوتي
ادوشنت
حتي اني وانوض وانتح هناش مانغلب في روحي
والكناين
فص ملح وداب
وقت الحاجة مانلقاهم
ياتيح سعد خوتي
مقيولة الخوت خوت انسائهم ياتعس من دار الزمان وجاهم
ياودي برد شين
والثلج اغرف بالرموك
وحتي اليوم الكل امرقد والكحة والشهقة اتقول فراريج اتصايحو
وحتي اني هاني خامدة تحت البطانية
ياودي افشلت وسيدي قالي يابنتي ارقدي وجهك اتقول عليه ليمة رامضة شور حتي انت طقك الفيروس
وممكنش حتي خوي طارق يبدرنا سفرة لروما باش انتعالجوا من الفيروس اللي احتل روارينا
شنو اللي امشواللعلاج بره مش خير منا وقبل مانختم معاكم بنحذر المعلمات والمعلمين من ضرب الصغار
ماهو امس حكتلي خالتي من العاصمة قالتي ابلة ضربت فرخ امشي ردلها الطريحة وامشت هي اتصلت بزوزها وجي بسلاحه هو واجماعته والفرخ حتي هو اتصل باهله وجو بسلاحهعم ماحد خير من حد وابدي الفشيق ايلعلع
فرفري ياليبيا وزيدي فرافير
واتطلعوا فروخ المدرسة وساقهم لحياشهم وماحزوها لين خليني ونخليك
مانا ههههههههه
الدنيا ساهلة
وياكبادي مالكم ومال العصا ابعدوا علي الشر وانغنوله
في حاجة نبي انقولها قبل ما نرقد لولد سيدي ماتقولش خيرك يامضدفضف
نهار ماجاب النهار وليل ماجاب الليل وانت اتقول برمو علي الجزيرة ياعطيك طيرة اصغار اتنقب عقاب دماغك
شنو ابديت وكيلها
المعتمد في البلاد اديرها نعرفك
تجري ولاتدري
المهم اتبين روحك وبعدين شنو الانتخابات اللي تبي اتخشها وانت قاعد مافقصتش من الدحية
ماني عارفتك سمعت بسيدي بقدم روحه نوضت انت زي الدودة وتبي توقف في طريق سيدي
ماهي مقيولة وين دمك وين همك
تبي انغزك غزة اليعك باش دير مليون احساب قبل لا توقف في اطريق سيدي وسيدك
اخ يادنيا

امممممممممممم حكاياتك تبي القهوة.... انا ما جيت من البداية

يامواطنه شنو فيها كان ولد سيدك بيقدم نفسة للانتخابات اهو زيتكم في دقيقكم ومن يقوز من عليتكم نصر ليكم وانشاللة لابس عليكم من المرض

مواطنه والله اشتقنا اشتقنا لكلامك وسعي بالك مع ولد سيدك وامتي بتحكينا عن حكايتك مع ولد سيدك مواطنه انا زي انتي اخدت برده قويه وغيبتك زادت الحال عليا

الواضح ياغزال شارد مواطنه ليبية مريضة بلهبه

صباحكم بالخير
ياتريس وانسوين البلاد
ونشكر كل من دخل علي يومياتي
باش يقرأ ولا حتي يتفرج
علي صورتي واني انخدم في الشاهي
ياودي عين وتطرشقت فيا
امرضت في جرة خوتي
مرضة شينة
كحة علي اعطاس
علي دوخة
اتقول عليا خشيت باب الوحم
وخوتي حتي هم امبتشين زيني
وسيدي وامي
حصيلة ماتسالوش
اني مرة
مرة
انبحت في ولد سيدي وشنومقايل وشنو امداير في غيبتي

عاد قلت عاد علاش نفتح في التلفزيون
ولد سيدي
تلفزيون ابروحه
ماراتاحش لين الشاكرة انقتهالي
ماني عارفاته مانا تحسبوه امحيره منو يقراله
تي هو كل هالهيد علي سباي
وماارقدش لين ورالي صورته وهو يجري ياباب
بفنليته الصفراء
ايوثق في روحه
ليوم زي هاليوم
عصلب زي بنت سيده
يالولا عزوزة الستوت اللي ساكنه تحته
قصدي مش تحته هو تحت شقيقته ياودي مش اخته
شنو نحكي بالرميكي
يعني حوشه
مش وقت القصة توا راني مازلت مريضة غير قلت انطل عليكم ياخوتنا
توا عاد قريب اتجيني السوريلا باش اتزلي الابرة
وبعدين توا نحكيلوكم بالتفصيل شنو صاير وممكن ايجيني الالهام
نحكي حتي اللي بصير
والان لكم هذه الهدية غلاكم
غلاكم كي
فروج
كي فروج
ايبقق
في قدور زينقو

مسائكم بلخير ياهل ليبيا
قبل ماانخش في الصحيح
لفت نظري
هو بيني وبينكم
ولد سيدي طلمسلي اعيوني من كثرة مايخربش واني نقرأ
قلت نشبح في كلمة عضو جديد

اخيه عليكم
بعد كل اللي عصرته من ادماغي ومرارتي
اديدروني عضو
وجديد بعد
حصيلة
بنقول لمدير الموقع
الايام كيف الريح في التبريمة
شرقي وغربي
مايدومش ديما
المهم جتني السوريلا نخصتني بالابرة وعدت في سبيل حالها
ياودي هالمرة نخصة شينة لين عيطت
واقريب فزعلي باكي مون

ماهو نخص الابرة بالقوية ضد حقوق الانسان وتعتبر
حريته وحقوقه منهوكة

ماهو هالايام قالوا حقوق الناس ناقصة في هالبلاد بعد عام من سقوط حكم القذافي
ياودي هالكلام كبير ويبي وقفة هكي كبرها
خليت هالموضوع للغزال الشارد
و ولد سيدي
اني خلوني بين خوتي وانسوينهم وسيدي
سادني
لكنتي فيه حاجة نبي انتكلم فيها طرحها علي بساط عجمي
ولد سيدي
وهي الانتخابات
ماهو المنجوه مايصدق حاجة اتخص الكرسي
يلهد وراها
وتارك وشونه وتارك 20 حاجة وراه
وبلهند ماغير وراء المجالس والبرلمانات
يامنجوه
خود مني هالكلمة وديرها خرص في ودانك
اللجنة ابقولي شفتها اشيابين
يرفعوا في ايديهم وهم يحسابوا ارواحهم قرينا قرينا امتعة ايام المؤتمرات
والشباب اللي اتنادي فيهم الرجول واليدين امقطعة
املوحين في المواني
والا يجروا وراء اهناش ماايلموا من تجارة الحروب واللي ابقي من المناخب الكبار
ومنهم اللي
يلهد فوق الميم ط
من مطار لميناء لمقر لفندق
هيه ومنهم في ساحات الجامعات
معتصمين
مرة مافيش استاد
ومرة
مافيش كتاب
ومنهم امعاهم
امعاهم
وهو مافاهم راسه من رجليه
ومنهم الشيشة دوخاته
ومنهم اللي زي حالتك اينادوا
لكن انقولوا
انشالله غير
منادتك
انت
والواعين
ماايكونش في قربة مشروكه
متنساش اذكار المساء
والا هذي ماتعرفهاش

مرحبتين
ومراحب عالناس الباهية
خليهم في عماهم ايدششوا
يكتبوا عضو جديد
والا حتي قديم
معليشي صدارة
ياعرب بو غرارة
اه ياليعتي القوية
في نسوين خوتي

هذي مرات خوي الضاوي
بتهبل امي
كل مرة
اتقولها
كلام
وامي امسكينة
الفكر بلهون
واللي ايقولولها اعليه اتصدقه
اليوم اخر ماقالاته
قصة من 500 عام قالت امقيلها
عبسلام الاسمر
وامي غير
قوللها
عبسلام الاسمر
اتقعد
اتقول تستور
ياسويدي دعوتك تخطاني
ومنين انقوللها
منو هذا
زيدي كسري المرابطيه هظا خلاص اعسيلة من بر الروامة
يااعطي لمرات الضاوي جثامه
توا عاد هات امي شنو ايقنعها

ياشوقني في مرات خوي

اني الكحة من تركينة
اقريب اتهد صدري والشروبو انسكف فيه
اتقول مشروب لوز وما جاب معاي فائدة
الحصيلة
المنجوه ولد سيدي لقيته فبل اشوي
يقول ياشام
ايتخيل في روحه الزعيم
والا معتز
عيون الخزز زيه
اه لااتكلم علي حقوق الانسان اللي قالها ولد اليابان
يغطيه طعوان مش انت كاني ماني
مانه خير حقوق الانسان
اللي في اليمن وسوريا والعراق وفلسطين والصومال والمغرب وبلاد قناة روتانا

والا هوذا بينهم

ولد سيدي ماهوش فاضي لابحقوق الانسان
ولا حقوق الحيوان
توا
الا الانتخابات
بكري
سيدي
دار عليا بروفة
وقعدت انخش وراءه من دار لدار لين دوخلي راسي
اكثر ماني دايخة
هظا اني المتعلمة
مانا امي زعما
كيف بدير
توا بالسلامة الكحة عصرتني
اتبقوا انتم وبلادنا في خير وانشالله كل الناس في خير
وخمير ونعودوا عيلة والوطن بونا
ماغير الوطن
مالينا معشوق وانتخبوا اللي قلوبهم علي وطننا
مش اللي ايعطوكم افلوس خفافيش الليل تجار بيع الوطن
المخانب زمان وتو

بلاهي كل ما نجري وراء فيدوهات ولد سيدي

ايقولوا

القلاش

ابصر خيره

معليشي

ايكفي ايقروه الناس الاخري

ماهي مقيوله عروقنا

اتمد البره

هلا ومت هلا
اني خشيت غير بنقول لولد سيدي
خيرك يامنجوه ماقلت انخش علي ديوانية بنت سيدي وانشجعها حتي بكليمة
مش اتشوف في التريس خاشين
ايحيوا فيا وانت ودن من عجين وودن من طين
وكانك علي فيدووتاك امنين انخشلها
تقعد حلقة ادور في الوسط لين علي سباببها اعيوني اتخالفوا
اقعد فيها
مانبيلك تحية
اللي ماايجيش مع العروس
ماايجي مع خالتها
كليمة بنقولها
ويني نقرا في موضوع ولد الحاج
ربيع
ياودي اسمك سمح
قلت
علي سبة المخابرات
يحكيلي
سيدي
امنين خشوا مرة في الايام
البوليس لحوشنا
وهذايكا كانت اول مرة انخشوا فيها لبلاد
وجتهم معلومة ان سيدي داس المناشير في بيته
قالي سيدي
انتي كنتي في القماط شيعوك من جناقتك
يحسابوني
داس في قماطك المناشير
وك ياكبدي
تريتني
منجوهة من صغري
ايام لاتردها
ومش كل واحد ايتكلم زيني ومليوع مع اهله زيني
امنين
كنت مرفوعة من جناقتي وسيدي هاج
ناس ياسرة كانت
تلعب في السيزة
وتاكل في شامية الغزالة بين شارعين ودردوحة وتقول الفاتح وبس
وياقائد ماتهتم
انصفوهم بالدم
وليبيا الغد وسيف منقدنا

هههههههههه
تاكي
تاكي
ياشارعين ودردوحه

صباجكم بلخير
ياهلنا باين عليه ولد سيدي ناض يتبعثر في بطانيته
سبقتك
واللي سبق غز النبق
اني خشيت قيل شوية
يعني قبل قصعة البازين غير قلت نمشي للكوجينة اهناش مانلقي حاجة انقرش فيها
توا بدل اذكار الصباح
جايب هالاخونجي

ياريت هالحاجة الكبيرة
يعني
طارق بن زياد
والا جوهر الصقلي
كيف قلت ولد سيدي
خش في الصحيح وسمع كلام المشراط
اللي كان
اينبه فيه
وابدي يكتب وينقل من كل وادي عصا
فيسع فيسع
مابرم
وحن لجماعة مانقعدوا فيها غير احني
بدل مايتكلم علي التعليم والصحة والكفرة والفقر واللاجئين
لا مش لاجين الصومال لاجينا احني اللي المنقوش
قاعد يحسابنا
امتع الزمان
ايزلبحوا فينا
بالامور تمام
والا ماتتكلموا لين يتكلم اهل سركوزي
حصيلة علي الضمائر السلام

كيف حالكم ياحبابنا
توا اللي ايشفوني مرة مرة نطلع نقول في كليمة امبغبغة اعليا
يحسابني
ساس علي قنطرة
ومايندري
عليا واني انكحكح والدوخة ياكبادي
حتي تحت البطانية
مش مفارقتني
اتقول عليا شامة جيفة
اه ياروحتي

مانيش امعلقة اليوم علي ولد سيدي
خليه يرفس ابروحه
لكنتي
قلت بس نبي
انقول
ياهل ليبيا
زعما وزير الدفاع وين
وزعما وزير الداخلية وين
وين وين
وقلبي عاش حزين
في غيابك يازين
وين
وين
وين الحكومة

من اللي صاير في الكفرة
هه وين المنقوش
وين اللي بلا نقيشة وحولين ماكملوه الوانه صبغوه
وزادوا دكانه
لوحة بلوحة
حولين
ماكملوش النقيشة
ريشة
بريشة
ماهوش كي
بخنوق عيشة
هذا بروحه
بخنوق
بنت المحاميد توحة
اه يابلد
ويانا لمريضة مريضة
جيبولي
الدكتور مريضة
اه ياوطن الاجداد ولد سيدي زعما اغانيا ماطلعتش في المايك

يامنجوه

قالك واحد واحد

فوته علي غيري

قالك زعما صوتي يطلعش حلو

يغني واجناحه ايرد عليه

من الاخير خطاني

حرارتي مرتفعة

ومش ناقصة

هبالك

يمهبلني

ومدروشني

يوميات مواطنه ليبيه إمنوره المنتدي .
و كلامك روعه

ربي يعطيك الصحة ماشاءالله عليك والله