الثلاثية الليبية

فيه ثلاثيات هلبة فى العالم يتكلموا عليهم ... لكن هادى ثلاثيات فى ليبيا .... بس ... بس

تفضلوا ...

ثلاثة تسبب الإحباط : الواسطة ... و الديون ... والمنتخب الليبي .


ثلاثة صعب نتخلى عنها : الماء...والهواء...والبازين .


ثلاثة محتاجات واسطة : البعثات..والشقق...وأى مصلحة إدارية تبي تقضيها


ثلاثة يرفعوا الضغط : الملح..وزحمة المرور..والعيل كان عشش .


ثلاثة تسبب الغرور : الفيلا... والهامر..وبدلة الحرس البلدي .


ثلاثة ياكلوا في لحوم البشر: الحيوانات المفترسة....والبزناسة الكبار ... وجماعة القرمة كان شبعوا .


ثلاثة لازم نتخلى عليهم : التفنيص.. والتلقيح....واللُّـقني وقت العمل .....


ثلاثة ما يرقدوش الليل : المديون.. والخانب.. وواحد نايضة عليه السوسة .


ثلاثة شبه اختفوا من ليبيا : الدلاع الطويل.. واحترام الشيابين ....والفراشية .


ثلاثة ما تحسش بطعمتهم الا في ليبيا : امبكبة على الحطب....وبورديم.....وشاهي العالة ...


ثلاثة تدعو لهم بالهداية : البلعوط ..والمحسدي.. والخنايسي .... يكفيكم شرهم


ثلاثة ما تستغربش منهم في ليبيا :

واحد قاص السريع على رجليه..... وواحد يسوق في الاتجاه العكسي ..... وواحد طالع في الاحمر..


ثلاثة كان مشوا تتمنى ما عادش يولوا : الفقر ..والمرض.. والبنت كان تزوجت .


ثلاثة تتمنى ما تصبحش فيهم : سواق افيكو مستعجل....وطابور طويل في الشيل.... والمدير المتعارك مع مرته ..


ثلاثة ربي يفكك منهم : مجاري مفتوحة......وكلب مطلوق .....ورالرشادة الطايشة .


ثلاثة ما ليهمش معنى إلا في ليبيا : العسلوز.. والزميطة.. والعصبان ...


ثلاثة لا تستخدم إلا في ليبيا : الحمّاس..والكانون...والمغرف ...

مشكور خوي
**درناوي متغرب**
على الموضوع الرائع و الجميل و الطريف و المسلي


أختي
**سمراء**
شن هما الكلمات اللي ما فهمتيهم قوليلي نا بس توا نشرحهم لك
.. أصلن فهمتهم كلهم الا وحده بس "العسلوز" ...

وفيكـ باركـ الله

باللقني وقت العمل ... حتى نا مش عارفها نسيت نقول لكـ حتى هيا مش عارفها


أما بالنسبة العيل كان عشش
معنا العيل لما يسكن "سكنان" ... عشش يعني سكن ... او بالاحرى عشش زي اليمامة اللي تعشش فوق الظلالية متاعت حواشين العرب

والرشاده ... هي الحيطة "الحجارة"

العسلوز ... يعلم بيها ربي

أختي
**سمراء**

الله يسلمكـ ... وأجعنكـ ما تفقدي غالي
وفيك يباركـ الله



خوي
**درناوي متغرب**
مشكور يا خوي وباركـ الله فيكـ وكثر الله من أمثالكـ
والله ليكـ وحشة ... وعاش من شافكـ خويأ