شوى دردشة على جو اعداد اعداد الطب فى جامعة شيحا

بسم الله الرحمن الرحيم
السلام عليكم ورحمة الله وبركاته


بما انى طالب فى سنة اولى اعداد طب فى جامعة شيحا قلت نحكيلكم شوى عليها

طلعت النتيجة الثانوية القلب مش قاعد فى مكانه الوجهه اصفر ليبيانا طولت ما ردت ,النت الاعمال جارية لتكون النتيجة على الموقع، الليل فى نصه ،وليبيانا ولا على بالها ،وكأن مفش انسان قاعدة النار تاكل فيه والدمعة شوى وتنزل لولا الحشم بس وجو الراجل ممنوع يبكى ، وحالة عد، مليت ونا نراجى مشيت رقدت وقررت انتخيل ان النتيجة منزلتش، بس المشكلة تفوير الدم لما يكلمك واحد ويقولك رانى نجحت ليبيانا دزتلى وانت شن صار فيك ونابيدى بكل اسى مش عارف والله مزلت انراجى ، رقدت ووعيت ع الساعة 8 حليت النت على طول ، وااااااااااااااااااو النتيجة طلعت ع النت ، اللحظة الحاسمة ادخل رقم الجلوس ثم انتر، الف مبروك ناجح ،ممتاز، طبعا عمك بوصاحب توا قاعد طاير فى السماء شوى ويغمى عليا من الفرحة سوف احقق حلمى وادخل الطب يااااااااااااااااااى ممتاز مش امصدق روحى ، بدت مكالمات التهنئة وجو خطير بكل بعد فورة الدم الليل كله.

طبعا بعد ما انتهى كل شى عمتك ليبيانا وعيت ع الساعة تسعة فى الصبح ودزت الرسالة بس بعد شنو كنت ليا ساعة عارف النتيجة وانتهت هالقصة.





شلنا الملف للجامعة وسجلنا فى كلية الطب وعقلى كله نجوم وقلوب واحلام وكانى ماشى ناخذ فى شهادة التخرج مش ماشى انسجل والطريق طوييييييييييييييييييلة حتى هنا 7 سنين


بدينا فى القراية طبعا متأخر فى شهر 11 ، وجينا بحتنا للمواد القيناهن ست مواد ، اما جو خطير بكل .
طبعا كلهم بالانجيليزى الا الفكر والاحصاء.


وبدينا فى جو القراية ، جانا دكتور فى الكيمياء كان شرحة مش اوى وفيه طلبة وطالبات واجد ما يفهموش منا ، مساكين امكملينها طياح فى مكتبة اقرأ، طبعل نحن لم نرضى ذلك ، وطبعا اغلب الطلبة والطالبات من النوع امتاع قراية وطياح .

مشينا فكرنا انقدموا شكوة وبلكى تصدف مع انا فيه ناس يقولوا الشكوة كانه كلام فى الهوى ومش حيعدلوا عليكم ويضربوكم فى الصفر، مشينا اتفقنا نحن والبنات ، البنات اكتبن شكوى ونحن كتبنا شكوة ، وجا بطل قسمنا فراس التركاوى ومنحكيلكمش على ناره الحامية مشى خذا الاوراق ونسقهم فى الحوش وكتبها على الكمبيوتر بيش تقعد شكوة محترمة



وطبعا اتحدنا ع الشكوة وجينا للجامعة ولمينا البنات وعمك فراس واحمد بوظهير وشلة عد على طول شور الادارة بش منظرنا طبخة متقول باب الحارة الدار امتلت بالكامل ، بس كانت شكوة خطيرة بكل كان فراس كتبها بطريقة ما توقعناها بكل يعنى شكوة مقنعة للغاية.


والطبخة اننا شكينا فى ثلاث دكاترة شن نقوللكم ساخنين بكل ومزلنا فراحة بالجامعة طبعا مزلنا اول سنة.


بس سبحان الله بعد العطلة ردينا امتحنا وبعدها كانت المفاجاة فعلا دكتور الكيمياء تغير وجابولنا دكتور مصرى عموما هكى مزلنا انقولوا كويس.



معلش طولت عليكم بالكتابة بس ان شاء الله بلكى اسع نكتبلكم اخرى ع اعدا الطب
وانفكر اندير جو المحاظرات ع النت يعنى مثلا يكون شرح المحاظرة بالعربى وطبعا حيكون على منتدى ايراسا الدرناوى.




انقدم خالص الشكر الى مدير المنتدى تقى الدين
وشكرا على اهتمامك بالمنتدى

كيف سنه اولى جامعه خزرطه
يعني نأخذ الشهاده الثانويه و نبطل ؟؟؟
طبعاً لا مجرد اتهزي و يا جبل ما تهزك ريح ونحنا لها
وربي يخلي لكم فارس القبيله فراس التركاوي "هرقل جامعه شيحا " على اخبرك

لكن بصراحه ربي يعينكم على السبع السنين في الصيدله لكن بما انا النيه و العزيمه و الاصرار متواجدات يبقى "نو بروقروم فيلز"
"بروقورم فيلز " جمع مذكر سالم لمشاكل الطلبه
وربي يوفقك يا اخي تقي في قرايتك وانتا كذلك يا سلام دانك في الصيدله و الاخت لؤلؤه في تخصصها اللي هو

والفكره سديده ومناسبه امتاعت انك تدير محضرات على الانترنت و نرجو انكم تبدو فيها لكي يستفيدو شباب درنة لانا بصراحه درنة فيها دماغات و ناس ما يعلم بيهم الا ربي و ربي يحفظهم و يخليهم لنا و نحنا ما نبوش نضيعوهم

وانتا يا اخ سلام دانك جري و شجاع بصراحه ومن دون مجماله و ربي يحفظك و يخليك
وبارك الله فيك على موضوعك الرائع و الذي فيه نسبه تفاعل كبيره

وتقبل مروري الكريم على الموضوع الساخن و الذي طفىء لفتره بسيطه ونتمنى انا يتلهلهب من جديد